IPL 2025 mein Royal Challengers Bengaluru (RCB) ko unke home ground M. Chinnaswamy Stadium mein Gujarat Titans (GT) ke haathon 8 wickets se karari haar ka samna karna pada. Is match ke baad RCB ke naye captain Rajat Patidar ne media se baat karte hue kuch aise hints diye jo shayad fans ko chubhenge.
Unhone yeh tasleem kiya ki team ka intent acha tha, lekin powerplay mein 3 wickets gir jaana ek badi galti thi. RCB ke star openers Phil Salt (7 runs) aur Virat Kohli (14 runs) jaldi out ho gaye, jiska team ke overall score par bura asar pada.
“Mujhe lagta hai intent sahi tha, lekin powerplay mein 3 wickets girna – ek wicket zyada tha. 200 ka target nahi tha, hum 190 tak soch rahe the, lekin jaldi wickets girne se plan flop ho gaya. Bowlers ne zabardast fight di, aur chase ko 18th over tak le jaana badi baat thi. Jitesh, Liam Livingstone aur Tim David ka batting positive tha. Batting line-up par hume bharosa hai, unka intent impressive hai.” – Rajat Patidar
GT ke Mohammed Siraj ne 2 aur Arshad Khan ne 1 wicket lekar RCB ke top-order ko hila diya. Patidar ke statements se yeh saaf hai ki unka focus team ke performance par tha, lekin fans ne unka indirect nishana Kohli aur Salt par bhi mehsoos kiya.
Shubman Gill ki captaincy mein GT ne yeh tournament ka apna doosra match jeeta. Wahi RCB, jo pehle do away games jeet chuki thi, is match mein apna pehla defeat face kar gayi. Ab unka agla match 7 April ko Mumbai Indians ke khilaf hoga Wankhede Stadium mein – jahan fans ek fiery comeback ki umeed laga rahe hain.
RCB ke liye yeh match ek wake-up call ho sakta hai. Kya Kohli aur Salt wapas form mein aayenge? Kya Patidar ki captaincy pressure sambhalegi? Yeh sab dekhna ab aur bhi exciting hoga!
