IPL ka junoon chha gaya hai aur Delhi Capitals (DC) ne ek aur zabardast jeet ke saath sabko chokaa diya! Chennai Super Kings (CSK) ke khilaaf Chepauk ke maidan par 25 runs ki jeet ne DC ko points table ke top par laa diya hai.
Match ka hero bana KL Rahul, jinhone toss jeet kar batting choose ki aur fir 51 balls mein 77 runs ki dhamakedar innings kheli. Baaki batters ne bhi apna yogdaan diya aur DC ne 20 overs mein bana daale 183 runs.
Bowling side pe bhi DC ka jadoo chal gaya. CSK ke batsmen kabhi bhi comfortable nahi dikh rahe the. Vijay Shankar ne zaroor 69* runs banaye 54 balls mein, lekin wo innings bhi CSK ko jeet ke kareeb nahi le ja paayi.
Axar Patel ne kiya chot ka khulasa
Match ke baad DC ke captain Axar Patel ne ek aisa sach bataya jo sabko hairaan kar gaya. Bhale hi unki team ne teen matches back-to-back jeete hain, lekin Axar khud poori tarah se fit nahi the.
“Mujhe nahi laga tha teen jeet lagatar itni aasan hongi. Sabne contribute kiya, team ka balance accha lag raha hai. Captain ke roop mein teen mein teen jeet milna ek alag hi feeling hai. Aaj main khud ko save kar raha tha kyunki meri ungli mein chot hai. Har match mein kuch kamaal ke catches hote hain aur kuch drop bhi. Abhi tak perfect match nahi khela hai humne. IPL ek lambi race hai, momentum kabhi bhi badal sakta hai,”
– Axar Patel, Post-match Presentation
DC ne ab tak LSG, SRH aur CSK ko hara diya hai aur 6 points ke saath points table mein top par hai. Ab agla mukabla hoga Royal Challengers Bengaluru (RCB) ke khilaaf 10 April ko Bengaluru mein. Kya DC jeet ka silsila jari rakhegi? Yeh toh time hi batayega!
