April 7 ko Wankhede Stadium mein ek blockbuster clash dekhne ko mila jab Royal Challengers Bengaluru (RCB) ne Mumbai Indians (MI) ko 12 runs se hara diya. RCB ne 222 ka target diya, jiske chase mein MI ka start kaafi shaky tha – 12th over tak team thi sirf 99/4 par.
Tabhi aayi batting ka tufaan! Hardik Pandya aur Tilak Varma ne milkar game ki picture hi badal di. Dono ne sirf 34 balls mein 89-run ki lightning-fast partnership banayi. Hardik ne sirf 15 balls mein 42 runs jode – 3 boundaries aur 4 chakko ke saath! Tilak bhi peeche nahi rahe, unhone 29 balls mein 56 run thok diye – 4 fours aur 4 sixes ke saath!
Lekin jitna maza batting mein aaya, utna hi disappointment MI ke bowling se hua. Sirf Jasprit Bumrah hi the jo RCB ke batters ke samne tik paye. Baaki sab bowlers ki to literally batti gul ho gayi:
- Trent Boult – 2 wickets but 57 runs in 4 overs (Economy: 14.25)
- Deepak Chahar – 2 overs, 29 runs, koi wicket nahi (Economy: 14.50)
- Pandya himself – 2 wickets but 45 runs in 4 overs (Economy: 11.25)
- Will Jacks, Vignesh Puthur, Santner – Sabka economy rate 10 ke upar tha
“It was a run-fest. Wicket bahut hi achha tha batting ke liye. Do shots short reh gaye, warna match hum jeet jaate. Bowlers ko kuch zyada options nahi mile – execution ka mamla tha. Main harsh nahi banna chahta, kyunki pitch pe bowlers ke paas chhupne ki jagah nahi thi.” – Hardik Pandya, post-match presentation mein
Hardik ne batting order mein changes par bhi roshni daali:
“Naman Dhir ka original role lower order mein tha. Pichhle match mein Rohit available nahi the to usse upar bhejna pada. Ab jab Ro wapas aa gaye, to woh apne asli spot par aa gaya. Tilak ne kamaal kiya. Powerplay crucial tha, aur hum execution mein thode short pad gaye. Bumrah jaise player ko team mein rakhna ek blessing hai. Positivity ke saath khelo, life ka best cricket khelo – hum apne players ke saath khade hain.” – Pandya
Agla match mein RCB takrayegi Delhi Capitals se April 10 ko, jabki MI bhi DC ka samna karegi April 13 ko. Kya MI comeback karegi? Yeh dekhna interesting hoga!
