Chennai Super Kings (CSK) ka IPL 2025 mein safar ab tak kuch khaas nahi raha hai. Team ne ab tak 5 matches khele hain, jisme se sirf ek jeet hi haath lagi hai – woh bhi apne bade rival Mumbai Indians ke khilaf. Lekin Punjab Kings ke khilaf hui chauthi lagataar haar ne team ke fans aur experts dono ko niraash kar diya hai.
Robin Uthappa, former India cricketer aur Jio Hotstar ke expert, ne CSK ke middle order ki dhajjiyan uda di. Unka kehna hai ki team ne shuruaat toh badhiya ki, lekin beech ke overs mein na toh momentum tha aur na hi intent.
“Shuruaat badhiya thi, lagbhag 9.8-9.9 runs per over ka rate tha, jo ki inke openers ke hisaab se expected tha. Lekin jab aap ek bada target chase kar rahe ho, toh middle overs mein game slip karna allowed nahi hai. 7 se 12 overs ke beech ka approach kaafi dull tha. Powerplay ke baad aapko bade overs chahiye hote hain pressure banaye rakhne ke liye. Aur wahi CSK nahi kar payi. Aakhri do overs mein 42 runs chahiye the – jo obviously bahut zyada hai. Agar middle overs mein 15-20 runs ke 2 overs nikaal lete, toh end tak equation sirf 22-25 runs ka hota. Bas intent hi nahi tha.”
CSK ab points table mein ninth position</strong par hai, jo unke standards ke bilkul hi neeche hai. Captain Ruturaj Gaikwad ke under team ka performance ab tak flop raha hai. Ab CSK ka agla match 11 April ko Kolkata Knight Riders (KKR) ke khilaf hoga, apne home ground MA Chidambaram Stadium, Chennai mein.
Ab dekhna yeh hoga ki kya CSK apne middle order ki iss dikkat ko address kar payegi, ya phir unki haaron ka silsila jaari rahega.
