New Delhi: Delhi Capitals ka IPL 2025 mein jeet ka safar ruka, jab Mumbai Indians ne unhe 12 runs se hara diya. Match ke baad DC ke stand-in captain Axar Patel ne seedha middle order par utha diya sawal, kaha – “soft dismissals aur bekaar shots ne match haath se nikal diya”.
Arun Jaitley Stadium mein khele gaye is thriller mein DC ne 206 runs ka target chase karte hue shuruaat toh dhamakedar ki thi, lekin middle overs mein poora momentum hil gaya. Karun Nair ne 89 runs ki zabardast inning kheli, lekin unke alawa koi bhi batter MI ke disciplined bowling attack ke saamne tik nahi paya.
“Game hum pakad chuke the. Par kuch soft dismissals aur galat shots ne beech ke overs mein game kharab kar diya. Har baar lower order pe bharosa nahi kar sakte. Bahut zyada sochne ki zarurat nahi, bas ek bura din tha. First innings ke baad toh main kaafi khush tha. Ball pehle thoda ruk raha tha, lekin baad mein easy ho gaya. Dew ne bhi madad ki. Hamare teen spinners mein se do powerplay aur death dono mein daal sakte hain. Kuldeep toh kamaal kar raha hai. Batting bhool jaate hain, next match pe focus karte hain,”
– Axar Patel, post-match presentation
Match ki baat karein toh DC ne ek samay 119/1 ka strong position bana liya tha, lekin teen run-outs aur ek over mein sirf do boundaries milne ke baad poori innings 193 runs par khatam ho gayi – sirf 19 overs mein. Mumbai Indians ne is win ke saath tournament mein apni doosri jeet register ki.
Ab DC ko karni hogi apni batting strategy par thodi rethink, kyunki tournament abhi lamba hai – aur ek haar se poora campaign nahi bigadta, par seekhne ka mauka zaroor milta hai.
