Rohit Sharma, jise fans pyaar se ‘Hitman’ bulate hain, IPL 2025 mein abhi tak apne naam ke saath insaaf nahi kar paaye hain. Lekin ex-Mumbai Indians coach Mark Boucher ka kehna hai – picture abhi baaki hai, doston!
Filhal Rohit ne IPL ke 6 matches mein sirf 82 runs banaye hain, average raha 13.67 – jo unke standards ke hisaab se kaafi neecha hai. Lekin, Boucher ko lagta hai ki Rohit ka rhythm wapas aane laga hai, aur ek bada innings bilkul nazdeek hai.
“Rohit Sharma took it upon himself to go after the bowlers. Humne dekha purana Rohit wapas – bade bade sixes, woh bhi full confidence ke saath. Mujhe uska attitude pasand aaya. Bowlers pe pressure daala, scoring chances banaye. Jab tak woh 30 ke upar pahucha, mujhe laga – ek bada score bas aane wala hai. Woh zone mein wapas aa gaya hai,” Boucher ne kaha Jiostar se baat karte hue.
MI aur CSK ka agla muqabla 20 April ko Mumbai ke Wankhede Stadium mein hoga. Yeh season ka doosra takraav hoga in dono arch-rivals ke beech. Pehle match mein Ruturaj Gaikwad-led CSK ne MI ko 4 wickets se hara diya tha.
MI ke liye season ki shuruaat kuch khaas nahi rahi thi, lekin ab Hardik Pandya ke leadership mein team ne back-to-back jeet haasil ki hai – pehle Delhi Capitals, phir Sunrisers Hyderabad ke khilaaf. 7 matches mein ab tak MI ne 3 jeet darj ki hai, aur points table mein 7th position par hai.
Toh kya CSK ke khilaaf match mein hoga Rohit Sharma ka comeback? Fans toh eagerly wait kar rahe hain ki unka Hitman ek explosive innings khelega aur critics ke muh band karega!
