Ahmedabad, April 19: IPL 2025 ka ek aur dhamakedaar match Narendra Modi Stadium mein dekhne ko mila jahan Gujarat Titans (GT) ne Delhi Capitals (DC) ko 7 wickets se hara diya. Is match ka star bane Jos Buttler, jinhone sirf 54 balls mein 97 runs thok diye — 11 boundaries aur 4 chhakkon ke saath.
GT ko 204 runs ka target mila tha, aur unhone usse chase kiya with style. Sherfane Rutherford ne bhi 43 runs se Buttler ka sath diya, jabki Sai Sudharsan ne 21 balls mein 36 runs banakar chase ka base set kiya.
DC ki batting bhi buri nahi thi. Unhone 8 wickets ke loss pe 203 runs banaye. Axar Patel ne 39, Ashutosh Sharma ne 37, Tristan Stubbs ne 31 aur Karun Nair ne bhi 31 runs ki important innings kheli. GT ke liye Prasidh Krishna ne 4 wickets le kar DC ko rokne ka kaam kiya.
“Hum 10-15 runs short the. Jab humne accelerate karne ki koshish ki, tab wickets girte gaye. Finishing waisi nahi ho payi jaise socha tha. Bowling theek-thaak thi, par agar hum kuch aur chances create kar lete to match close ho sakta tha. Sirf 2-3 hits ki baat thi. Ab zyada nahi sochenge is loss ke baare mein,”
– Axar Patel, post-match presentation mein
GT ki is jeet ke baad wo IPL 2025 points table ke top pe pahunch gaye hain. Halanki DC ke bhi 10 points hain, par net run rate ke wajah se Gujarat upar hai. Punjab Kings aur Royal Challengers Bengaluru bhi top-4 mein bane hue hain. Wahin Sunrisers Hyderabad aur Chennai Super Kings bottom mein struggle kar rahe hain.
DC ka agla match April 22 ko Lucknow Super Giants ke saath hai, jabki GT April 21 ko Kolkata Knight Riders ka saamna karegi.
IPL ka ye season har roz naye drama aur excitement se bhara hua hai — aur aise hi matches fans ko edge pe rakhte hain!
