Royal Challengers Bengaluru (RCB) ke liye IPL 2025 ka yeh match ek nightmare ban gaya hota, agar Tim David ne last mein aake team ko na sambhala hota. Match Bengaluru mein tha, rain-curtailed tha aur sirf 14 overs ka rakha gaya. Lekin RCB ke top-order ka haal toh aisa tha jaise bowling practice chal rahi ho – 42/7 ka score tha ek time pe, aur fir 63/9 in just 12 overs.
Tab aaya Tim David ka storm mode. Last over mein Harpreet Brar ke against unhone teeno balls pe sixer jod diye aur RCB ka score 95/9 tak le aaye. Match toh RCB 5 wickets se haar gaya, lekin David ban gaye ‘Player of the Match’.
“Hamare coaching staff aur management ne team ko ek strategy ke hisaab se banaya hai. Mujhe lagta hai main achha feel kar raha hoon batting mein. Agar mujhe top-order mein mauka mila toh main zarur aur contribute karunga. Kabhi-kabhi jab aap zyada try karte ho toh chizein nahi hoti. Aaj ki pitch bhi tricky thi, aur bowlers ke sath partnership banani padti hai yahan Bangalore mein,” Tim David ne broadcasters se kaha.
Maiden #TATAIPL fifty for Tim David 👊 Relive his three consecutive sixes 🚀
Scorecard ▶ https://t.co/7fIn60rqKZ
#RCBvPBKS pic.twitter.com/iGtby4FPTy — IndianPremierLeague (@IPL) April 18, 2025
Home Ground Par Kya Ho Raha Hai, RCB?
David ne yeh bhi admit kiya ki RCB ka home form kuch khaas nahi raha hai. Unka kehna hai ki team ko ek winning template banana hoga jo home conditions mein kaam kare.
“Har match mein conditions alag thi. Aaj baarish thi, pitch covers ke neeche thi aur predict karna mushkil tha ki pitch kaise behave karegi. Home par humne achha nahi khela hai. Hume ek template banana hoga jisse hum jeet sakein,” David ne confess kiya.
Pitch Tha Tough, Par Strategy Se Mara
26 balls mein 50 banane wale David ne bataya ki pitch easy nahi thi, lekin pehle out hone wale batters ne unhe pitch ke behavior ke baare mein inform kiya.
“Mujhe laga batting itni easy nahi thi. Lekin top-order se feedback mila aur pitch observe karne ka time bhi mil gaya. Practice pitches bhi same jaise thi. Strategy bana ke khelne ki koshish ki,” 29-year-old Aussie ne bataya.
Filhaal RCB points table par fourth spot pe hai with 4 wins in 7 matches. Ab agla encounter hoga Shreyas Iyer-led PBKS ke against, April 20 ko, unke home ground pe – revenge time?
