Mumbai Indians ne ek baar phir dikhaya ki unka Wankhede mein dum alag hi level ka hota hai. CSK ke against high-voltage encounter mein, Suryakumar Yadav aur Rohit Sharma ne aisi batting ki ki Chennai ke bowlers bas dekhte reh gaye. Rohit (76*) aur SKY (68*) ne MI ko 9-wicket ki zabardast jeet dila di, aur CSK se pehle wale defeat ka badla bhi le liya.
Is match ke baad Suryakumar Yadav ne post-match interview mein bataya ki kaise Rohit Sharma ki ek advice ne unki innings ka direction hi badal diya.
“Mainne pehle hi bola tha match ke pehle – ghar pe cake bake ho raha hai. Rohit bhai legend hain, unhe game ki samajh hai. Thoda grip tha pitch pe, par unhone bola ‘apne shots khel’. Coach ne bola tu No. 3 pe jaa raha hai, to maine socha Jadeja ko dominate karna padega. Red soil maidanon mein khela hoon, to spin samajhta hoon. Agar nahi chalta to bhi theek, par koshish karni thi. Points table dekhna nahi, sirf game jeetna hai abhi.” – Suryakumar Yadav
MI ki batting dekhkar laga jaise kisi ne fast-forward button daba diya ho. CSK ke bowlers ko pitch se madad milne ki umeed thi, lekin Wankhede ki batting-friendly surface ne unki saari strategy fail kar di. Target tha sirf 177 ka, jise MI ne aasan tareeke se sirf ek wicket ke nuksaan pe chase kar liya – wo bhi 4 overs pehle!
Is jeet ke saath MI ne points table mein bhi leap liya aur chhati position pe aa gaye. Lekin sabse important baat ye thi ki Rohit Sharma ka form wapas aaya, aur SKY ki explosive batting ne MI fans ka dil jeet liya.
Ab dekhna ye hai ki MI is momentum ko kaise carry karti hai tournament ke aage ke matches mein. Agar Rohit aur SKY aise hi khelte rahe, to samajh lo IPL 2025 mein MI ka comeback game strong hone wala hai!
