IPL 2025 ke ek dhamakedaar match mein, Avesh Khan ne Rajasthan Royals ke khilaf aisi bowling ki, jo yaadgar ban gayi. Match ke aakhri 3 overs mein jab RR ko sirf 25 runs chahiye the, tab Avesh ne dikhaya apna asli magic!
RR 156/2 pe tha 17 overs ke baad. Sabko laga match unke haath mein hai. Lekin tabhi aaye Avesh Khan, jinhone pehle 18th over mein Yashasvi Jaiswal aur stand-in captain Riyan Parag ko clean bowled kiya. Aur phir last over mein Shimron Hetmyer ka wicket lekar match LSG ke naam kar diya.
“Main Mitchell Starc nahi banna chahta, mujhe ek achha Avesh Khan banna hai. Yorker meri strength hai aur jab clarity hoti hai, to execution perfect hota hai. Scorecard dekh ke nahi dalta, sirf sochta hoon ki pehle 3 balls boundary na jayein,” Avesh ne match ke baad kaha jab unhe Player of the Match declare kiya gaya.
Match ke last over mein RR ko sirf 9 runs chahiye the. Pressure high tha, lekin Avesh ne pura cold-blooded style mein yorkers deliver kiye. Aur jab laga ki match nikal sakta hai, tab unhone dikhaya nerves of steel!
“Take a bow, Avesh Khan! 9 runs defend karna against RR’s power hitters is no joke. Unbelievable composure!” – Ek fan ne X (Twitter) par likha.
Final over mein thoda drama bhi hua. Jab Shubham Dubey ka catch David Miller se chhoot gaya, tab Avesh ke mann mein bhi doubt aaya ki shayad match haath se nikal jaye.
“Ball hawa mein gaya to laga catch pakka hai. Lekin jab chhoda, aur sirf 4 runs chahiye the, tab laga koi edge boundary na chali jaye,” Avesh ne confess kiya.
Last over ke dauraan unhe ball haath pe aur boot pe lagi, jiski wajah se wo properly celebrate bhi nahi kar paaye. Lekin good news – injury serious nahi thi!
“Haath pe ball laga aur laga jaise fracture ho gaya ho. Bone pe lagi thi, isiliye dard zyada hua. Isliye celebration nahi kar paya,” Avesh ne bataya.
Is jeet ke baad Lucknow Super Giants ke 8 matches mein 5 wins ho chuke hain aur wo ab points table mein 4th position pe hain. Agla match unka hoga April 22 ko Delhi Capitals ke against.
Avesh Khan ne ye clear kar diya hai – wo kisi aur ki copy nahi, apne dum pe apna naam banana chahte hain!
