Wankhede Stadium ek baar phir Mumbai Indians (MI) ke dhamake se goonj utha jab unhone apne bade dushman Chennai Super Kings (CSK) ko 9 wickets se dhool chata di. Lekin is jeet ke peeche ek strong emotional moment tha – aur uska credit jata hai MI ke batting coach Kieron Pollard ko.
“Mahela (Jayawardene) ne mujhe bola ki aaj tum team ko address karo. Maine bas ek hi baat boli – ‘Main thak chuka hoon Chennai ko well played kehkar har saal.’ Aur aaj jo humne kiya, woh bindaas tha.” – Kieron Pollard, Star Sports par
Pollard ke is powerful speech ne team mein ek alag hi energy bhar di. CSK ne pehle batting karte hue 176/5 ka score banaya, lekin MI ke openers ne to usse bachon ka khel bana diya!
Suryakumar Yadav, jo kaafi time se form dhoondh rahe the, finally apne classic avatar mein dikh gaye. Unhone number 3 pe promote hoke sirf 30 balls mein 68 runs banaye – 6 chaukke aur 5 chakke ke saath. Aur unke saath the Rohit Sharma, jinhone 45 balls mein 76* runs banaye.
Yeh dono milke CSK ke bowlers pe toofani attack lekar aaye. Dono ke beech 114 runs ki unbroken partnership ne game ka pura momentum MI ke court mein daal diya.
Is zabardast jeet ke baad MI ab points table mein chhatwe number pe pahuch gayi hai – 8 matches mein 4 jeet aur 4 haar ke saath. Agla muqabla 23 April ko hoga Hyderabad ke Rajiv Gandhi International Stadium mein Sunrisers Hyderabad (SRH) ke khilaaf.
Pollard ke emotional spark ne sirf ek match nahi, balki MI ke campaign ko ek naya life diya hai. Kya yeh momentum unhe playoffs tak le jayega? Yeh dekhna abhi baaki hai!
