Eden Gardens mein hua IPL 2025 ka high-voltage match jisme Gujarat Titans (GT) ne defending champions Kolkata Knight Riders (KKR) ko 39 runs se dhool chata di. Captain Shubman Gill aur unke opening partner Sai Sudharsan ki solid batting ne team ke liye jeet ki neev rakhi.
Post-match presentation mein Gill ne bataya, “Bohot khushi hui. Yeh do matches humare liye bohot crucial the, aur humne waise hi perform kiya jaise chaha tha. Sai ke saath kabhi yeh baat nahi hoti ki kisi ek ko end tak tikna hai. Hum dono ka simple mantra hai — best game khelo, jitna ho sake run banao aur naturally bat karo.”
“Hum game mein pehle se hi aage the, par match ko close karna equally important hota hai. Aaj bhi agar main thoda aur tikta to 10 run extra mil sakte the. Lekin is format mein perfection mushkil hota hai, jeet ka tareeka dhoondhna padta hai – aur GT woh kaam ache se karti hai.”
Match ki shuruaat KKR ke toss jeetne aur fielding choose karne se hui. GT ke liye Gill ne 55 balls mein 90 runs (10 fours, 3 sixes) aur Sudharsan ne 52 runs (36 balls, 6 fours, 1 six) banaye. In dono ki partnership ne team ko ek strong total tak pahunchaya.
Run chase ke dauraan, KKR ka batting lineup bikharta nazar aaya. Sirf unke captain Ajinkya Rahane hi kuch fight dikha paye with 50 runs in 36 balls. GT ke bowlers Prasidh Krishna aur Rashid Khan ne 2 wickets leke KKR ko sirf 159/8 tak hi rok diya.
Iss haar ke saath KKR ab 7th position par pahunch gaya hai, jahan unke paas 3 jeet aur 5 haar hain. Wahin GT ne 6 jeet aur sirf 2 haar ke saath 12 points ke saath top spot pakki kar li hai.
GT ka ye performance IPL 2025 mein unki serious title contender wali image ko aur strong banata hai.
