Ek blockbuster moment IPL 2025 ka – KL Rahul ka ek viral video ne social media pe aag laga di hai. Match ke baad jab sab players LSG owner Sanjiv Goenka se mil rahe the, tab Rahul ne bas ek haath milaya aur seedha Delhi Capitals ke dugout ki taraf nikal gaye – Goenka sirf muskura ke reh gaye!
Rahul walking away from goenka 🤣🤣😂 #klrahul #goenka #ipl #LSGvsDC
— SarpanchSaab (@kitts1727) April 22, 2025
Ye incident hua Ekana Stadium, Lucknow mein, jahan Delhi Capitals ne LSG ko 8 wickets se haraya. Ye match sirf DC ki jeet nahi thi, balki Rahul ke liye bhi ek emotional comeback tha – pehli baar unhone apni purani team ke khilaaf IPL mein khela.
KL Rahul ne LSG ko 3 saal tak lead kiya tha, aur do baar playoffs tak pahunchaya bhi. Lekin mega auction se pehle franchise ne unko release kar diya. Ab DC ne unhe Rs 14 crore mein kharida, aur wo form mein bhi hain – LSG ke khilaaf 57* (42 balls) ki winning knock kheli, 3 chhakke aur 3 chaukay ke saath!
Is knock ke saath hi Rahul ban gaye sabse tez 5000 IPL runs complete karne wale player – sirf 130 innings mein! Pehle ye record David Warner ke paas tha (135 innings), aur Virat Kohli ne ye milestone 157 innings mein achieve kiya tha.
Ye pehli baar nahi hai jab KL Rahul aur Sanjiv Goenka ke beech kuch awkward moment dekha gaya ho. IPL 2024 mein bhi, SRH ke khilaaf 10-wicket loss ke baad Goenka unpe gussa karte hue camera mein capture hue the.
Fans ab is video ko lekar speculate kar rahe hain – kya Rahul ne janbujhkar ignore kiya ya bas ek momentary lapse tha? Jo bhi ho, ye video to IPL ke most talked-about moments mein shamil ho chuka hai!
