Chennai Super Kings (CSK) ki hal-filhal ki form IPL 2025 mein fans ke liye kaafi frustrating rahi hai. Par CSK ke CEO Kasi Viswanathan abhi bhi apni team par pura vishwas jatate hain. Unka kehna hai ki ‘Thala’ Dhoni ke experience aur calm leadership mein team ek baar phir se apna jalwa dikhayegi.
IPL 2025 ke ab tak ke matches mein CSK ne 8 mein se 6 matches haar diye hain aur points table mein 10th position par hai. Recent match mein Mumbai Indians (MI) se haari ke baad unke playoffs ke chances ab nazuk dikh rahe hain. Lekin Viswanathan ne team ko support karte hue kaha:
“Aap sab thode disappointed honge CSK ke performance se iss saal. Of course, yeh kabhi na kabhi toh hona hi tha. Pehle bhi aisa hua hai. Hum jaante hain ki abhi tak accha cricket nahi khel pa rahe hain, lekin umeed hai ki aane wale matches mein hum zarur behtar karenge.”
Unhone ye bhi yaad dilaya ki 2010 mein bhi CSK ne season ki shuruaat weak ki thi, lekin phir Mumbai ko final mein hara kar title jeeta tha. Yehi belief unka ab bhi hai:
“Humare paas Shivam Dube jaise talented player hain, jo pichle kuch seasons se consistently perform kar rahe hain. Aur jab tak Thala Dhoni jaise leader team ke saath hain, toh sirf waqt ki baat hai ki hum wapas aa jaayenge.”
CSK fans ke liye yeh ek hopeful message hai. Ho sakta hai ki team abhi low phase mein ho, lekin history ne baar-baar dikhaya hai ki jab tak Dhoni team mein hain, tab tak comeback hamesha ek option hota hai!
Ab dekhna yeh hai ki kya CSK iss season mein phir se fans ko surprise karegi?
