Uppal, Hyderabad: IPL 2025 mein Sunrisers Hyderabad (SRH) ka safar lagta hai kishti mein chhed ke jaisa ho gaya hai. April 23 ko Rajiv Gandhi International Stadium mein Mumbai Indians (MI) ne SRH ko 7-wicket se ragra diya.
Rohit Sharma ne 70 run ki dhamakedaar pari kheli aur Trent Boult ne 4 wicket le kar Hyderabad ke batting lineup ka kabada kar diya. Heinrich Klaasen (71) aur Abhinav Manohar (43) ne kuch fight dikhayi, lekin SRH sirf 143/8 tak hi pahuch payi.
Rohit aur Ryan Rickelton ne MI ke liye shandar shuruaat di. Rickelton jaldi out ho gaye (11 run), lekin Rohit ne apni form continue rakhte hue dusri consecutive fifty jodi. Will Jacks ne bhi 22 runs ka tezz contribution diya. Jab Rohit 70 pe out hue, MI ki jeet ka aadhaar ban chuka tha. Suryakumar Yadav ne 40 run ki composed inning kheli aur MI ko aasan jeet dilayi.
“Klaasen aur Abhinav ne acha khela, lekin kabhi momentum mila hi nahi. 2-3 wickets girte hi kisi ko ship sambhalna chahiye tha, jo nahi ho paya. Pitch pe run banana possible tha agar samajh ke khela jata. Har baar pitch alag hoti hai, aur har match naya hota hai. Pehle match mein 280+ run the, ab sirf 143. Yeh hi T20 cricket hai – unpredictable!”
– Pat Cummins, Post-Match Presentation
MI ki yeh chouthi consecutive jeet thi, jo unhe points table mein teesre number tak le aayi hai. Wahin, SRH ki chhati haar ne unhe table ke bottom mein, nauwe number pe laa diya hai.
MI ka agla match 27 April ko Lucknow Super Giants ke khilaf hoga, Wankhede Stadium mein. SRH apna next battle Chennai Super Kings ke khilaf khelegi 25 April ko Chepauk mein. Fans umeed kar rahe hain ki SRH kuch to comeback kare.
