IPL 2025 mein Rajasthan Royals ke liye debut karte hi Vaibhav Suryavanshi ne aisa kaam kar dikhaya jo cricket ke fan kabhi nahi bhoolenge. Sirf 14 saal ka yeh ladka, pehli hi ball par Shardul Thakur jaise seasoned bowler ko chhakka jadh ke sabko hairaan kar gaya!
Vaibhav ke coach Manish Ojha ne khulaasa kiya ki yeh youngster ka mindset hi use apne saathiyon se alag banata hai. Coach ke mutaabiq, “Woh 10 saal aage ka sochta hai. Jab doosre bacche 40-50 balls practice karte hain, Vaibhav roj 400-500 balls practice karta tha.”
“Vaibhav came to me when he was around nine years old. Samastipur se Patna 100 km ka safar woh roz karta tha. Subah 7:30 baje se lekar shaam tak training karta, phir ghar wapas. 4 saal tak yeh routine chala,” – Manish Ojha
Rajasthan Royals ne Vaibhav ko ₹1.1 crore mein kharida, lekin unka turant debut hona expected nahi tha. Lekin captain Sanju Samson ke injury ke baad, RR ne bold decision leke Vaibhav ko mauka diya – aur usne pehli ball par hi chhakka maar ke history likh di.
Vaibhav ke fearless attitude ka saboot unke ek aur quote se milta hai:
“Once during a match simulation, I asked him why are you not taking singles and doubles. He said, ‘Jis ball ko main chhakka maar sakta hun usmein single kyun lun?’”
Ojha ne yeh bhi bataya ki Vaibhav ka attacking nature hi uska signature style hai. Woh kabhi pressure mein nahi aata – chahe saamne koi bhi bowler ho.
“He has always been an attacking player. His intent is very different. Woh kabhi backfoot pe nahi jaata. Seniors ke against bhi woh same confidence ke saath khelta hai,” – Ojha
Is kamyaabi ke peeche sirf talent nahi, par Vaibhav ke maa-baap ka dedication bhi tha. Unki maa roz 4 baje uth kar uske liye khana banati thi aur unke pita har match aur practice mein saath hote the.
“Uske pita cricket khelna chahte the, lekin mauka nahi mila. Ab woh apna sapna bete ke through jee rahe hain,” – Coach Ojha
Vaibhav Suryavanshi ka IPL journey sirf ek shuruaat hai. Agar yeh momentum continue raha, toh India ko ek aur batting superstar milne wala hai – jo na sirf shot selection mein fearless hai, balki dedication mein bhi unbeatable hai.
