IPL 2025 mein Royal Challengers Bengaluru (RCB) ki form kamaal ki rahi hai – lekin sirf opposition ke ghar mein! Ab tak ke season mein RCB ne jitni bhi jeetein hasil ki hain, woh sab away matches mein aayi hain. Lekin jab baat aati hai unke apne home ground M. Chinnaswamy Stadium ki, toh RCB ka record kuch khaas nahi raha hai.
Ab tak RCB ne Chinnaswamy mein 3 matches khele hain – aur teeno mein haar ka samna kiya hai. Dusri taraf, unhone Chennai Super Kings (CSK), Mumbai Indians (MI), Rajasthan Royals (RR), Punjab Kings (PBKS), aur defending champions Kolkata Knight Riders (KKR) jaise strong teams ko unke home grounds par hara diya hai. Iss contrasting performance ne fans ko hairaan kar diya hai.
Isi beech former India captain aur RCB ke ex-leader Anil Kumble ne diya hai ek crucial tip Virat Kohli aur Rajat Patidar ki team ko. Kumble kehte hain ki RCB ko jab wo pehle batting karte hain Chinnaswamy mein, tabhi unka game bigad jata hai – aur iski wajah hai pitch ka sahi andaza na lagana.
“Batting first, they have not been great at the Chinnaswamy Stadium. Assessing that pitch is really important, and they have not been able to do that batting first,” Kumble ne kaha Jio Star ke interview mein.
Filhaal RCB ne IPL 2025 mein 8 matches khele hain – jisme 5 jeet aur 3 haar mili hai. Saari jeetein unhone away matches mein hasil ki, aur saari haar unke home ground par hui. Point table mein woh abhi 4th position par hain, ek solid Net Run Rate (NRR) +0.472 ke saath.
Aaj, Thursday, April 24 ko RCB ek baar phir se RR ke against Chinnaswamy mein khelne wali hai. Agar is baar jeet unke haath lagti hai, toh na sirf unka ghar ka bura record break hoga, balki woh IPL 2025 ke top 2 mein bhi pahunch sakte hain – depending on win margin!
Kya Kumble ki advice RCB ke ghar ka bhoot bhagane mein kaam aayegi? Yeh match dekhna toh banta hai!
