IPL 2025 ka action-packed season jaise hi 25 May ko khatam hoga, waise hi Mumbai ke top cricketers ko ek aur important duty ke liye ready rehna padega. Mumbai Cricket Association (MCA) ne ek zabardast farmaan sunaya hai jisme kaha gaya hai ki Mumbai ke domestic players ke liye T20 Mumbai League mein hissa lena ab mandatory hoga!
Suryakumar Yadav, Shreyas Iyer, Ajinkya Rahane, Shardul Thakur, aur Shivam Dube jaise bade naam IPL mein toh shine kar rahe hain, lekin IPL ke baad unhe local Mumbai league mein bhi apni presence dikhani padegi. Yeh rule sabhi un Indian players par lagu hoga jo Mumbai ki taraf se domestic cricket khelte hain.
“All Mumbai’s Indian players have been informed that they have to play the T20 Mumbai League, which will begin after the IPL. It’s mandatory, unless those who have India commitment or injury issues, they can skip,”
— MCA source ne The Indian Express ko bataya
Lekin haan, agar koi player India ki England ke khilaf 5-match Test series ke liye select hota hai ya phir kisi injury se joojh raha hai, toh unhe chhutti mil sakti hai. MCA ne clearly mention kiya hai ki sirf specific conditions mein hi exemption milega.
Is baar MCA T20 Mumbai League Season 3 ko aur bhi grand banane ki planning mein hai. Unki poori koshish hai ki Rohit Sharma ko tournament ka brand face aur ambassador banaya jaye, taaki league ka star power aur fan following dono badh sake.
Sirf yehi nahi, MCA ne ek solid financial incentive bhi announce kiya hai – har Indian player ko league mein hissa lene ke liye 15 lakh rupees ka alag se participation fee diya jaayega. Yeh amount unke auction earnings ke alawa hoga. Clearly, MCA chaahta hai ki Mumbai ke star players home ground par bhi apna magic dikhayein!
Toh fans ho jaao ready, IPL ke baad Mumbai T20 League ka mazaa bhi double hone wala hai!
