Royal Challengers Bengaluru (RCB) ke fans ke liye ek badi khabar hai! Gujarat Titans (GT) ke khilaaf IPL 2025 ke match ke dauraan Virat Kohli ko ungli mein chot lag gayi thi, lekin team ke head coach Andy Flower ne confirm kiya hai ki Kohli ab theek hain aur Mumbai Indians (MI) ke khilaaf agle match ke liye tayaar hain.
Ye incident M. Chinnaswamy Stadium mein hua tha jab Kohli ne 12th over ki paanchvi ball par Sai Sudharsan ke powerful shot ko boundary pe rokne ki koshish ki. Ball unke haathon se nikal gayi aur Kohli turant dard mein dikhai diye. Physio unhe turant attend karne aaye, lekin treatment ke baad unhone fielding continue ki.
“Virat looks fine, he’s okay,” – Andy Flower, post-match press conference.
Performance ki baat karein to Kohli ka GT ke khilaaf match kuch khaas nahi raha. Unhone sirf 7 runs banaye aur Arshad Khan ki ball par deep backward square leg pe catch out ho gaye. IPL 2025 ke is season mein pehli baar aisa hua jab unka score 40 ke neeche raha.
Unke baad Devdutt Padikkal aur Phil Salt bhi powerplay ke dauraan hi out ho gaye, jiska asar poore team ke performance par pada. RCB, jo CSK aur KKR ke khilaaf zabardast jeet ke saath season ki shuruaat ki thi, unhe pehla loss GT ke against jhelna pada. Iss haar ke baad RCB points table mein ab third position par hai.
Ab sabki nazar hai 7 April ko hone wale blockbuster match par, jahan RCB ka samna hoga Mumbai Indians se Wankhede Stadium mein. Fans bas yehi dua kar rahe hain ki King Kohli full form mein wapas aayein aur ek aur dhamakedar performance dein!
