Chennai Super Kings (CSK) ka IPL 2025 ka safar ab tak kisi nightmare se kam nahi raha. Wankhede Stadium mein Mumbai Indians ke haathon 9 wicket se haarne ke baad, CSK IPL points table mein bilkul neeche aa gayi hai. Fans hi nahi, franchise ke legend Suresh Raina bhi is girti halat se naraaz hain.
“Mujhe lagta hai kahin na kahin inse (CSK) auction acha nahi hua hai. Auction mein itne talented players the. Kaha gaye woh sab? Aap Rishabh Pant, Shreyas Iyer, aur KL Rahul ko chhod kar aaye. Itna paisa lekar bhi aapne unhe nahi uthaya? Aaj tak maine CSK ko aise struggle karte hue nahi dekha,”
Raina ka ye outburst unke deep emotional connection ko dikhata hai jo unka CSK ke saath raha hai. 4 baar IPL trophy jeetne wali team se aisi umeed kisi ne nahi ki thi.
Iske baad former Indian spinner aur ex-CSK player Harbhajan Singh ne bhi team ke talent scouting system par sawaal uthaye.
“CSK ek badi team rahi hai. Lekin is baar auction mein unke decisions samajh se bahar the. Jo youngsters liye gaye, woh game-changers sabit nahi ho rahe. Talent scouts se zarur puchtaachh honi chahiye, kyunki selection unki reports par based hota hai.”
CSK ke mid-season changes bhi team ke performance ko affect kar rahe hain. Captain Ruturaj Gaikwad ke injured hone ke baad, 17 saal ke Ayush Mhatre ko chance diya gaya, jinhone MI ke khilaaf ek chhoti lekin impactful inning kheli. Saath hi, South African player Dewald Brevis ko bhi team mein shamil kiya gaya hai, lekin ab tak unka performance dekhna baaki hai.
CSK ka agla mukabla 25 April ko apne ghar par Sunrisers Hyderabad ke against hai. Ab yeh dekhna hoga ki kya yeh ‘men in yellow’ comeback kar paayenge ya nahi.
