IPL 2025 Mein Mausam Ka Twist!
26 April ko Eden Gardens mein hone wala Kolkata Knight Riders (KKR) aur Punjab Kings (PBKS) ka zabardast takkar, lagataar baarish ke wajah se adhoora reh gaya. Punjab Kings ne apni innings mein dhamaka karte hue 4 wickets ke loss par 201 runs ka bada target set kiya tha.
KKR ne apna chase shuru kiya hi tha, sirf 7 runs pe bina kisi wicket ke, jab baarish ne match ka mood bigaad diya. Umpires ne conditions dekhte hue game cancel kar diya, aur dono teams ko ek-ek point mila.
Points Table Ka Naya Scene
Iss washout ke baad, Punjab Kings 9 matches mein 11 points ke saath chauthi position pe aa gaye hain, jabki Kolkata Knight Riders 7 points ke saath saatve number par hi atke hue hain.
PBKS Ki Zabardast Shuruaat
Toss jeet kar batting choose karne wale Shreyas Iyer ka decision bilkul sahi sabit hua. Opening duo, Prabhsimran Singh aur Priyansh Arya ne 11.5 overs mein 120 runs ka zabardast partnership joda. Prabhsimran ne sirf 49 balls mein 83 runs banaye, jisme 6 chhakke aur 6 chauke shamil the. Priyansh Arya ne bhi 35 balls par 69 runs banaye, 8 chauke aur 4 chhakkon ke saath.
Captain Shreyas Iyer ne bhi 16 balls par ek chhakka aur ek chauka laga kar valuable 25 runs jode, aur Josh Inglis 6 balls par 11 runs banakar not out rahe.
KKR Bowlers Ki Koshish
Vaibhav Arora ne 4 overs mein 34 runs dekar 2 wickets liye, jabki Varun Chakravarthy aur Andre Russell ne ek-ek wicket apne naam kiya.
Rain Ke Interrupt Hone Se Pehle…
Jab match roka gaya, tab Rahmanullah Gurbaz 1 run par the aur Sunil Narine 4 run bana chuke the. Yeh IPL 2025 ke 18th season ka pehla match tha jo baarish ke wajah se cancel hua.
Aage Ka Schedule
Punjab Kings ab Chennai Super Kings (CSK) ke against 30 April ko MA Chidambaram Stadium mein khelenge, jabki Kolkata Knight Riders ka agla muqabla Delhi Capitals ke saath 29 April ko Arun Jaitley Stadium mein hoga.
